ՀՀ ԱՆ. Առաջընթացի մեկնարկային արդյունավետ տարի

Ներկայացնելով անցած մեկ տարվա ընթացքում առողջապահության ոլորտում իրականացվող բարեփոխումները` նախարար Լևոն Ալթունյանն ընդգծել է, որ ժամանակակից առողջապահությունը բաղկացած է երկու խոշոր մասից` հիվանդությունների կանխարգելում ու հանրային առողջապահություն և հիվանդաբուժություն։

Անդրադառնալով հիվանդությունների կանխարգելմանը նշել է, որ միջազգային կառույցների կողմից շարունակվում են Հայաստանի ցուցանիշներն օրինակելի մնալ վարակիչ կառավարելի հիվանդութունների կանխարգելման ուղղությամբ պատվաստումների ավելի քան 90 տոկոս ընդգրկվածության շնորհիվ։ Նախաքաղցկեղային և քաղցկեղային վիճակների նվազեցման նպատակով նախատեսվում է 13 տարեկան աղջիկների շրջանում մարդու պապիլոմավիրուսային վարակի դեմ պատվաստման ներդրում։ ՄՊՎ-ի դեմ պատվաստումներ իրականացնող 71 երկրի փորձը, ինչպես նաև ապացոցւողական բժշկության վրա հիմնված գիտական ուսումնասիրությունները վստահեցնում են, որ պատվաստումն անվտանգ է և արդյունավետ։

Այսօր ամբողջ աշխարհում առավել մեծ մարտահրավեր են ոչ վարակիչ հիվանդությունները, որոնք մահացության կառուցվածքում կազմում են մինչև 80 տոկոս։

Մահացության կառուցվածքում առաջին երկու տեղն զբաղեցնող ոչ վարակիչ հիվանդությունների` սրտանոթային հիվանդությունների և չարորակ նորագոյացությունների կանխարգելման, վաղ հայտնաբերման, ախտորոշման և բուժման գործընթացները միջազգային ժամանակակից մոտեցումներին համապատասխանեցնելու նպատակով նախաձեռնվել է սրտանոթային հիվանդությունների և չարորակ նորագոյացությունների դեմ պայքարի ազգային ռազմավարությունների մշակման գործընթաց։

 Այդ նպատակով ստեղծված սրտանոթային հիվանդությունների դեմ պայքարի ազգային ռազմավարութան մշակման հանձնաժողովը ղեկավարում է ՌԴ Ա.Վ.Վիշնևսկու անվան վիրաբուժության ինստիտուտի գիտության և նորարարական տեխնոլոգիաների գծով տնօրենի տեղակալ, պրոֆեսոր, ակադեմիկոս, ճանաչված սրտաբան Բագրատ Ալեքյանը։ Իսկ Մեծ Բրիտանիայի առողջապահության նախկին նախարար, Լոնդոնի Կայսերական քոլեջի ղեկավար, լորդ Արա Դարզին սիրով համաձայնել է լինել չարորակ նորագոյացությունների դեմ պայքարի ազգային ռազմավարության մշակման հանձնաժողովի համանախագահը։

«Սակայն, առանց առողջ ապրելակերպի հնարավոր չէ շոշափելի արդյունքների հասնելը։ Այստեղ մենք ակնկալում ենք հանրության և առաջին հերթին լրատվամիջոցների աջակցությունը։ Մենք վճռական ենք և ձեզ հետ աշխատելու ենք այնքան, մինչև որ Հայաստանի տարածքում ծխելն ընկալվի որպես ոչ մոդայիկ և ամոթալի արարք»,-ասել է նախարարը։

Նշենք, որ օգոստոսի 3-ին ՀՀ կառավարության հավանությանն է արժանացել «Ծխելու դեմ պայքարի ռազմավարությունը», որի թիրախը առաջիկա 3-4 տարում ծխող տղամարդկանց թիվը շուրջ 10 տոկոսով կրճատելն է։ Այժմ ձևավորվում է Ծխելու դեմ պայքարի գործողությունների իրականացման համակարգող միջգերատեսչական հանձնաժողով։ Զուգահեռաբար աշխատանքներ են իրականացվում օրենսդրական դաշտը կատարելագործելու ուղղությամբ։

Բուժական մասը ներկայացնելով` Լևոն Ալթունյանը կարևորել է ֆինանսավորման մեխանիզմների բարեփոխումը։

«Հեծանիվ չհորինելով` մենք հետևել ենք աշխարհի առաջավոր փորձին։ Իսկ աշխարհի փորձն այլընտրանք ապահովագրությանը չի առաջարկում»,-ասել է նախարարը` մանրամասնելով, որ պետությունը կանխում է ռիսկի գործոնները, իրականացնում գումարների հավաքագրումը և ապահովագրական ռեզերվների կառավարումը, իսկ ծառայությունները բնակչությանը մատուցում են առևտրային ընկերությունները։

Նախարարը ծանոթացրել է նաև բժշկական ծառայությունների գնագոյացման նոր մեխանիզմի տրամաբանությանը։

Ընդգծված սոցիալական ուղղվածություն ունի պետական պատվերի տեղադրման նոր մոտեցումը, որը ենթադրում է սոցիալապես անապահով և հատուկ խմբերում ընդգրկված ավելի քան 610 հազար քաղաքացու բժշկական օգնության ու սպասարկման կազմակերպում պետության կողմից ձեռք բերված ապահովագրական փաթեթների միջոցով:

Արդյունքում` սոցիալապես անապահով և հատուկ խմբերում ընդգրկված բնակչության համար մատչելի կդառնա բժշկական օգնությունը։ Ծրագիրը կգործի 2018թ. ապրիլից։ Փաստորեն, սոցփաթեթի շուրջ 100 հազար շահառուներին` ավելի փոքր խմբին՝ հոկտեմբերի 1-ից նույն մեխանիզմով բժշկական օգնության տրամադրումը դրան նախորդող պիլոտային ծրագիր է։

Ընդգծվել է, որ այս երկու ծրագրում թաքնված խոչընդոտների կամ թերությունների շտկումով էլ կմշակվի ամբողջ բնակչության պարտադիր բժշկական ապահովագրության օրենքի նախագիծը։

Նախարարն անդրադարձել է նաև ոլորտում իրականացվող օպտիմալացման, առանձին թիրախային ծրագրերին (հեպատիտ Ց-ով 1000 հիվանդի բուժման, կուրության կանխարգելման), բժշկական հաշտարարի ինստիտուտի և էլեկտրոնային առողջապահական համակարգի ներդրմանը և այլ ծրագրերին։

Լևոն Ալթունյանը նաև պատասխանել է լրագրողների հարցերին։

Հարցեր, պատասխաններ, մեկնաբանություններ